:: Zoram News
September, 2008

** Stadium & Airport: Mizoram State Works Advisory Board chuan AR Lammual-a stadium sa turin Llyod Insulations (India) Ltd., Kolkata chu a thlang a. Lengpui Airport siam changtlun hna thawk turin M/S Tantia Construction Ltd. Kolkata a thlang bawk.

** Hlawhbi thar: Mizoram Sawrkar chuan School  Education Department hnuaia Zirtirtu chi hrang hrang, Education Volunteer te leh Adhoc Aided Teacher te telin, an hlawh bi (Pay Scale) thar pekna tur order leh AH & Vety Doctor-te hlawh bi siamthatna order a tichhuak.

** IR Police lambun: Mizoram Kohhran Hruaitute Committee (MKHC) thuchhuah chuan Saipum leh Saiphai-a IR Police awmte hlawh pe tura kal, kawng laka lo lambun a, Police 4 lai kah hlum nia mi dang 3-in hliam an tawrhnaah pawi an tih thu sawiin he thil ti tute hi an dem takzet thu an tarlang.

** District thar: Mizoram state rorelna fel leh tha zawka a kal theihna'n district thar pathum: Hnahthial district, Khawzawl district leh Saitual district siam a ni. District ramri (boundary) awm dan tur chu sorkar-in a la siam fel leh dawn a ni.

** British MP Zoramah: British House of Lords member Baroness Cox chu mautam tamnain Zoram a nghawng dan leh Myanmar ramri hrula chengte khawsakna dinhmun a hmuna enfiah tura Mizoram lo kal chuan Mizoram kristianna leh hmasawnna hmel hmuh chu hlimawm a tihle.

:: Chhungkaw Chanchin
September 6,2008

** Vellore Mizo Welfare President Rev. K.M.Vanlalpeka chuan MCC lama kan member: Lalthanmawia Colney G.Secy., Vanlalfana, H. Rosangpuia, R.Lalrinchhana leh K.Lalramnghakate’n tlawmngaia Vellorea damlo thisen an pek chungchangah Welfare hmingin lawmthu a rawn sawi a, kan memberte tlawmngaihna hi hlu kan ti hle.

** Nikuma CMWA vice president Rev. Remlalfaka pawh Council for World Mission hnuaiah missionary thawk turin vawiin hian Penrhys, Wales lamah min kalsan ta. Duhsakna leh lawmpuina kan hlan e.

** Pi (Captain) Zotei pawh Leadership Training neia karkhat zet Coonoor, Nilgiri Hills lama a thangbo hnuin dam takin Chennai a lo thleng leh ta, kan Editor pawh tunah chuan a hmel hmuh a nuam leh ta viau.

** Kan Asst. Gen. Secretary Pu Benjamin L.Sailo pawh kar tharah hian USA, Texas lamah anmahni hna thil avangin min liamsan leh dawn ta, thla thum zet awmbo tur anih avangin Pi Lucy pawh lunglen a urlawk nasa hle, an pa hnenah, “Radio-a ‘Meet me in Texas moonlight’  tih hla an sak apiangin min rawn phone thin dawn nia,” tiin a chah lawk diam a ni awm e.

** Tv. Michael Lalrinkima Pachuau pawh class tour neiin Daman & Diu thliarkar lamah a thlawk liam ta. Hun hlimawm tak a hman kan duhsak e.
** Kan memberte Jerome Loyola, Raymond MCC leh Hriatpuia SRM chuan laptop computer an nei thar, kan lawmpui e.

** Kan member zai leh lam thian Tv. Mikea Loyola chuan hun rei tak atanga a lo veh ruk leh rim lawk fo thin angin nupui ni lo television thar a nei ta, inkhelh en nan liau liauva a lei a ni awm e.

** Tv. Faka AMET pawh a zirlai chhunzawm turin Newcastle lamah a liam thla ve leh ta. A zirnaah hlawhtlinna duhawm a neih kan duhsak e.

:: Hriattirna

In luah tur duh tan Medhavaram, Mehta Green Parkah in sak thar (apartment), Ist floor, 2 bedrooms a awm e. Kristian diltu duhsak bik an ni ang.
Contact: Melody Muanpuii – 9789086711.