:: 2008-09 Chennai Mizo Fresher Social tluang takin hmang zo ta

August 24, 2008: Ni 17. Aug 2008 khan CMWA hunpui pawimawh tak Fresher Social chu Pathian hruaina zarah tluang takin kan hmang zo thei ta a. Kan President sawi danin a hmun tur chungchangah pawh Chunglam hriattirna a tel nual. CMWA Asst. Secy. Pu Benjamin L. Sailo in kan hun hmasa min kaihruaia. Nl. Elizabeth Chawnghlut Fin. Secy. in tanna hun hmangin chumi hnuah kan thawhlawmte Tv. Lalthakima Worship Secy. in min hlan saka. Maj. Lalliankunga Vice President in hunserh hmangin thalai mithiam zawkten ram leh hnam hmasawnna tura mawhphurhna leh theihna kan neihzia sawiin memberte fuihna a neih hnuah Lalpa Tawngtaina sawiin hun hmasa chu tihtawp a ni a.

Hun hnihnaah Tv. Lalthanzama leh Nl. Nancy Laldinpuii ten nung takin min kaihruai a. Tv. R. Lalvena IAS in 'Welcome Speech' a sawi a. President Pu PC Lallawmsanga IPS in thuchah tawi Freshers te tan mai ni lo, member lo awm tawhte tan pawha thu tangkai tak a rawn sawi bawk. Chennai Mizo rock band (kan ti dawn em ni?!) ‘The Zuziz’ hovin hun engemaw chen ata an lo hahpui tawh ‘Welcome To Wherever You Are’ chu rimawi chikim nen memberte an rawn hluichhuak ta... thawm a tha hle. Vocalist khan sak chhan bik nei niawm takin a boruak san lai khan melh deuh bik a nei em ni aw tih turin thikthu chhe deuh mit chuan a lo hmu. Kan President pawh an thu hle hle thei lo. Electric Guitar chiau vawng vawng chuan an vanglaini a ngaih thar tir hle te pawh ani mahna.... presidentin a request angin CCR hla, 'Have you ever seen the rain?' an rawn vawrh leh ta, boruak a tha hle, tlar hnung lamin an rawn zawm dual dual bawk a. Kan worship secy Tv. Tka chuan "Nl. Remsiami hla sak lai khan ka helhhawlh nge, ka trim deuh sung sung mai..." tia a comment chuan thinlung a hneh zia a tilang. Henry-an 'Eagles' hla ‘The girl from yesterday’ a rawn thlawh zet chu(h) khualzahawmte leh presidentte lung a kuai hle; kan vice president Pu Kunga meuh pawh awm hmunah a lo thum ve dut dut a, Tv. Aldrina’n thalaite cho takin hla a rawn sak meuh chuan thinlung a khawih dan a dang, mipui an ngawi thup a, han en kual vel khan "Misual ka ni Lalpa min ngaidam rawh" ti duh hmel kan pu hlawm... thinlung a hneh a, beng leh mit a tlai .

Choolaimedu leh MCC ten Freshers te dangdai leh hmuhnawm, hlimawm takin an rawn ‘Welcome’ a. Anniho inbuatsaihna hi chawimawi tlak a ni, a creative bawn tawp a, mipuiin kan la mitthla thiam phak bakin item hlimawm an rawn chhawpchhuak a ni. CMWA hruaitute in hmelhriattirna Tv. Lalthanmwia Colney, Gen. Secy in a nei a. Tin, Freshers introduction leh interview ni pahfawm bawk chuan a zawttuten an thiam bawk a, mipuite min nuih tam tir hle. Freshers atang hian Mister leh Miss atan thlan an ni. Nuho mit Mister lama a fu thup ang bawkin Miss lamah paho mit a fu thup a, chawimawina hi an phu kan titlang a ni ber awm e. Tv. Liansangzuala, MCC in Freshers te aiawhin thu tawi fel tak a sawi leh bawk a. Tin, Freshsers' Day hian 'Summer Sports' a kan football playerte hnenah pakhatna an nih lawmpui nan cup hlan nghal a ni bawk.

Freshers’ Day chu ruai tui tak nen kan ti tawp a, nakum Freshers’ Day kan thlir leh ta daih mai. CMWA member Freshers’ Day rawn tel ve lo zawng zawng te chu ‘lenlai chan’ in ni.